Skrá yfir löggilta dómtúlka og skjalaþýðendur

Uppfærð 30. október 2008.

22.8.2006

Hér að neðan er skrá yfir þá sem hlotið hafa löggildingu dóms- og kirkjumálaráðuneytisins til að vera skjalaþýðendur og dómtúlkar, en skráin er haldin á grundvelli 4. mgr. 4. gr. laga nr. 148 20. desember 2000 um dómtúlka og skjalaþýðendur.

Skráin byggist aðallega á gögnum ráðuneytisins en styðst einnig við samantekt sem Félag löggiltra dómtúlka og skjalaþýðenda lét gera árið 1988 um þá sem þá höfðu hlotið löggildingu frá árinu 1942 að telja. Frá þeim tíma hefur þeim síðan verið bætt við sem hlotið hafa löggildingu á grundvelli prófrauna sem ráðuneytið hefur staðið fyrir, að jafnaði annað hvert ár.

Skráin er haldin í stafrófsröð innan hvers tungumáls. Hún geymir nöfn allra sem hafa fengið löggildingu. Skráin er ekki uppfærð með tilliti til þess hvort skjalaþýðendur eru lífs eða liðnir, hérlendis eða erlendis, og alveg án tillits til þess hvort viðkomandi hafa hagnýtt sér réttindin eða ekki. Nokkuð er um að löggiltir skjalaþýðendur hafi löggildingu í fleiri en einu tungumáli og eins er nokkuð um að sumir hafi ekki full réttindi, mega t.d. aðeins þýða úr íslensku á annað tungumál en ekki öfugt eða þá af erlenda tungumálinu yfir á íslensku. Undantekningalítið er skráð kennitala viðkomandi og hún notuð notað sem persónukenni. Ella er tilgreindur fæðingardagur eða skráð heimilisfang viðkomandi á þeim tíma er hann fékk löggildingu. Þá er tilgreint á hvaða ári viðkomandi hlaut löggildingu. Á listanum eru rúmlega 200 manns, sem hlotið hafa löggildingu frá 1942 að telja. Það skal áréttað að þessi skrá er réttindaskrá en ekki uppfærð þjónustuskrá.

Nafnið er jafnan skráð samkvæmt íslenskum reglum.

Við sérhvert nafn er skráð sú löggilding eða þær löggildingar sem viðkomandi hefur hlotið. Nafn þess, sem hlotið hefur löggildingu í þremur tungumálum, er því að finna á þremur stöðum.

Ekki er kunnugt um að neinir skjalaþýðendur eða dómtúlkar hafi verið sviptir réttindum sínum né að þau hafi verið afturkölluð.

Þeim sem eru í hugleiðingum um að leita til skjalaþýðenda eða dómtúlks í þjónustuskyni, má t.d. benda á að á heimasíðu Félags löggiltra dómtúlka og skjalaþýðenda (www.flds.is), er að finna félagaskrá yfir skjalaþýðendur og dómtúlka sem bjóða fram þjónustu sína.